މިލަދުންމަޑުލު އުތުރުބުރި

ފޭދޫ އޮންލައިން

ޖިއޮގްރަފީ

ށ. އަތޮޅު ނުވަތަ މިލަދުންމަޑުލު އުތުރުބުރިއަކީ އުތުރުން ތިން ވަނަ އަތޮޅެވެ. އަތޮޅަށް ދެވިފައިވާ އިނގިރޭސި އަކުރަކީ C އެވެ. އަތޮޅުގެ ޕޮޒިޝަނަކީ އިރުން 73 ދަރަޖަ އުތުރުން 6 ދަރަޖައެވެ. އަތޮޅުގެ ބޮޑުމިނަކީ 37 މޭލެވެ. މި އަތޮޅުގައިވާ 50 ރަށުގެ ތެރެއިން މީހުން ދިރިއުޅެނީ 14 ރަށުގައެވެ. އެއީ، ކަނޑިތީމާއި ނޫމަރާއާއި ގޮއިދޫއާއި ފޭދޫއާއި ފީވަކާއި ބިލެތްފައްސާއި ފޯކައިދޫއާއި ނަރުދޫއާއި މަރޮށްޓައި ޅައިމަގާއި ކޮމަންޑުއާއި މާއުނގޫދޫއާއި ފުނަދޫއާއި މިލަންދޫ އެވެ. އަތޮޅުގެ މަރުކަޒީ ރަށަކީ ފުނަދޫ އެވެ. އަތޮޅުގެ މަރުކަޒީ ރަށާއި މާލެއާއި ދެމެދުގައިވާ ދުރުމިނަކީ 123 މޭލެވެ.

އާބާދީ، ތަޢްލީމީ އަދި ޞިއްޙަތު 

2011 އޭޕްރީލް މަހުގެ ނިޔަލަށް މިއަތޮޅުގެ އާބާދީއަކީ 16171 އެވެ. އެއީ، 7891 އަންހެނުންނާއި، 8283ފިރިހެނުންނެވެ. އަތޮޅުގެ ހުރިހާ ރަށެއްގައިވެސް ސެކެންޑްރީ ތަޢްލީމް ދެވެއެވެ. މީގެ އިތުރުން ކަނޑިތީމުގައި ހުންނަ އަތޮޅު މަދްރަސާއިންނާއި، ކޮމަންޑޫގައި ހުންނަ އަތޮޅު ތަޢްލީމީ މަރުކަޒުން ހަޔަރ ސެކެންޑްރީ ތަޢްލީމު ދެވެއެވެ. އަތޮޅުގެ ހުރިހާ ރަށެއްގައިވެސް ޞިއްޙީ މަރުކަޒު ޤާއިމު ކުރެވި ޑަކްޓަރުންނާއި، ނަރުހުންގެ ޚިދުމަތް ލިބެމުންދެއެވެ. އަތޮޅުގެ ޞިއްޙީ ޚިދުމަތުގެ މައި މަރުކަޒަކީ ފުނަދޫގައި ހުންނަ އަތޮޅު ހޮސްޕިޓަލެވެ.

އިޤްތިޞާދު 

މިއަތޮޅުގެ ރައްޔިތުންގެ ތެރެއިން އެންމެ ގިނަ ބަޔަކު އާމްދަނީ ހޯދުމަށް ކުރާ މަސައްކަތަކީ މަސްވެރިކަމާއި ދަނޑުވެރިކަމެވެ. މީގެ އިތުރުން ޢިމާރާތް ކުރުމުގެ މަސައްކަތާއި، ފަތުރުވެރިކަމުގެ ދާއިރާގައިވެސް އާމްދަނީ ހޯދުމުގެ ގޮތުން އަތޮޅުގެ ގިނަ ޢަދަދެއްގެ ޒުވާނުން ދަނީ މަސައްކަތް ކުރަމުންނެވެ. ފަތުރުވެރިކަން ތަރައްޤީ ކުރުމުގެ މަސައްކަތް އަތޮޅުގެ ހަތަރު ރަށެއްގައި ދަނީ ކުރެވެމުންނެވެ. އެއީ، ވަނގަރާއި ދޮޅިޔަދޫއާއި ގާކޮށެންބާއި ކަނބާލިފަރެވެ. މީގެ އިތުރުން މަޑިދޫއާއި ރިނބުދޫއާއި ކުރެއްދޫއާއި ކުނބުރުދޫގައި ފުޅާ ދާއިރާއެއްގައި ދަނޑުވެރިކަން ކުރެއެވެ. އަދި ނަލަންދޫއާއި އެރިޔަދޫގައި އެކުއަރކަލްޗަރ ކޮށްގެން ހުއިފިލަނޑާ އާލާކުރުމުގެ މަސައްކަތް ކުރެއެވެ. މަސްވެރިކަމުގެ އިންޑަސްޓްރިއަލް ރަށެއްގެ ގޮތުގައި ކީކިމިނިވަނީ ތަރައްޤީކޮށްފައެވެ. 

ކަރަންޓުގެހާލަތު 

މިއަތޮޅުގެ މީހުން ދިރިއުޅޭ ހުރިހާ ރަށަކުންވެސް ސައުވީސް ގަޑިއިރު ކަރަންޓްގެ ޚިދުމަތް ވަނީ ޤާއިމު ކުރެވިފައެވެ. ކަނޑިތީމާއި ފޭދޫއާއި ފީވަކާއި ނަރުދޫއާއި ޅައިމަގާއި މާއުނގޫދޫއާއި މިލަންދޫގައި ކަރަންޓްގެ ޚިދުމަތް ދެމުންގެންދަނީ އަޕަރ ނޯތު ޔޫޓިލިޓީ ކުންފުނިންނެވެ. ކޮމަންޑޫ އަދި ބިލެތްފަހީގައި ކަރަންޓްގެ ޚިދުމަތް ދެމުންގެންދަނީ އެ ދެ ރަށުގެ އަމިއްލަ ދެ ޖަމްޢިއްޔާ އިންނެވެ. ނޫމަރާއާއި ގޮއިދޫއާއި ފޯކައިދޫއާއި މަރޮށްޓާއި ފުނަދޫގައި ކަރަންޓްގެ ޚިދުމަތް ދެމުން ގެންދަނީ އެ ރަށްރަށުގެ ރައްޔިތުންނެވެ.