ލޯތްބަކީ ލޯކަނު އެއްޗެކޭ ބުނެއެވެ. ލޯބީގެތީރުން ޒަޚަމުވެއްޖެ ހިތަކަށް ބޭހަކުން ފަރުވާއެއް ނުދެވެއެވެ. ލޯބީގައި މިއިން ކޮންމެ ގޮތެއް ވުމަކީވެސް އެކަށީގެންވާ ކަމެކެވެ. ލޯބިވީމަ ރީތިވަނީހޭ؟ ރީތިވީމަ ލޯބިވަނީހޭ؟ މިއީ ވަރަށް ގިނައިން ތަކުރާރުކޮށް ކުރެވޭ ސުވާލެކެވެ. މިސުވާލުގެ ޖަވާބުގައި އެކި މީހުން ދައްކަނީ ވަރަށް ތަފާތު ވާހަކަ ތަކެކެވެ. އޭގެތެރޭގައި މިދާއިރާގެ ފުންނާބުއުސް އިލްމުވެރިން ކޮށްފައިވާ ދިރާސާތަކާއި އާންމުންގެ ޚިޔާލުތައްވެސް ހުރީ ހަމަ މިފަދަ ގޮތަކަށެވެ. މިގޮތުން މިފަދަ ދިރާސާއަކަށް ބަލާލަމާތޯއެވެ.
ފަރަންސޭސިވިލާތުގެ ނަފްސާނީ އިލްމުވެރިޔާ ޑރ. ވިލްފްރެޑް 1950ގެ އަހަރުތަކުގައި ދެހާހަށްވުރެ ގިނަ ދެމަފިރިންނާއި އިންޓަވިއު ކުރުމަށްފަހު މިކަމާބެހޭ ދިރާސާއެއް އާއްމު ކުރެއްވިއެވެ. ފުރާންސަކީ އެދުވަސްވަރު ލޯބިވެރިންގެ އިޝްޤީ ގުޅުންތަކަށް މަގުފަހިވާފަދަ އެތައް އުފެއްދުންތަކެއް މުޅިން އަލަށް ދުނިޔެއަށް ތަޢާރަފް ކުރަމުންދިޔަ ގައުމެކެވެ. މިސާލަކަށް ފްރާންސްގައި އުފެދިގެން ދިޔަ ފެޝަން ހެދުންތަކާއި، ލޯބިވެރިންގެ މެދުގައި މަޤްބޫލުކަން ހޯދަމުންދިޔަ މީރުވަސްދުވާ ސެންޓުތަކުގެ ސަބަބުން އިޝްޤީ ޖަޒުބާތުތައް އުތުރި ކެކިގެން ދިޔައެވެ.
ޑރ. ވިލްފްރެޑްގެ ދިރާސާއަށް މީހުން ހޯދާފައިވަނީ ދުނިޔޭގެ އެކިކަންކޮޅުތަކަށް ޒިޔާރަތްކުރައްވާ، އެކަމަށްއެދި އަމިއްލައަށް އިސްނެގި ފަރާތްތަކުގެ ތެރެއިން ކާވެނިކޮށްގެން އުޅޭކަން ރަސްމީ ލިޔުންތަކުން ސާބިތުވާ ފަރާތްތަކެވެ. މީގެ ބޭނުމެއް ކަމަށްވަނީ ޒަވާޖީ ހަޔާތެއް ވޭތުކުރަމުންދާއިރު އެމީހުން އެމަތިވެރި ގުޅުމާއި ހަމަޔަށް ގެނެސްދިނީ ކޮންސަބަބެއް މެދުވެރިވެގެންކަން ބުނެދޭން ފަސޭހަވާނެތީ ކަމަށްވެއެވެ. މި ދިރާސާގެ ނަތީޖާއިން ކުރިން އެނގިފައިނުވާ ކިތަންމެ ކަންތައްތަކެއް ހާމަވެގެން ދިޔައެވެ. މީގެތެރޭގައި ދިރާސާގެ އަސްލު މަގްސަދާއި ނުގުޅޭ، ނަމަވެސް އިޖްތިމާއީގޮތުން ވިސްނަންޖެހޭ ކަންތައްތަކެއް ހުރިކަމަށް ފާހަގަކުރެއްވިއެވެ. ކޮންމެއަކަސް ދިރާސާގެ އަސްލާގުޅޭ ނަތީޖާ ދެއްކިގޮތުން %58 ދެމަފިރިން ބުނެފައިވަނީ އެމީހުންނަށް ފުރަތަމަވެވުނީ ލޯބި ކަމަށެވެ. ދެން އެލޯބި ގަދަވަމުންގޮސް އެކަކު އަނެކެއްގެ އައިބުތައް ހަނދާންނެތި ލޯބިވީމަ ރީތިވީ ކަމަށެވެ. އަދި ހަމަ މިދިރާސާއިން ދެއްކި އަނެއްކަމަކީ ލޯބީގެ ހުށަހެޅުންތައް ގިނައިން ލިބެނީ ރީތިވީމަ ކަމަށެވެ. ނަމަވެސް އެފަދަ ހުށަހެޅުމުން އުފެދޭ ގުޅުންތައް ކައިވެންޏާއި ހަމަޔަށް ނުގޮސް، ފުނޑު ފުނޑުވެގެންދާ ކަމަށެވެ. އެގޮތުން %38 ބައިވެރިންނަކީ ރީތިމީހުންނަށް ލޯބިހުށަހަޅާފައިވާ ނުވަތަ އޭނާގެ ރީތިކަމަށްބަލާ އެހެންމީހަކު ލޯބި ހުށަހަޅާފައިވާ މީހުންނެވެ. ނަމަވެސް ފަހުން އެހެން މީހަކާ ގުޅެންޖެހުނީ ކުރީގެ ގުޅުން ހީނަރުވަމުން ދަނިކޮށް އެހެން މީހަކަށް ހިތްކިޔައިގެން ކަމަށްވެއެވެ.
އަޅުގަނޑުމެންގެ ދިވެހިރާއްޖެއަކީވެސް އިޝްޤީ ރޮނގުން ވަރަށް ފާހަގަކޮށްލެވޭ ގައުމެކެވެ. ބުނެވޭ ގޮތުގައި އެއްޒަމާނެއްގައި މިސަރަހައްދުގެ އިނދެވަރިކުރުމުގެ ރެކޯޑު އޮންނަނީވެސް ދިވެހިރާއްޖެއަށެވެ. މީހުންނާއި އިނުމާއި ވަރިކުރުމުގައި އިޝްޤީ ޖަޒުބާތުގެ ރޯލެއް ނެތިނުދާނެކަން ކަށަވަރެވެ. ވުމާއެކު މިރޮނގުން ދިވެހިންގެ ތަޖުރިބާވެސް ވަރަށް މުހިންމު ވާނެއެވެ. އަޅުގަނޑު މިކަމާބެހޭގޮތުން ބައެއް ފަރާތްތަކުގެ ޚިޔާލު ހޯދާލީމެވެ. އިނދެގެން އުޅޭ ދެމަފިރިންނާއި މެދު ހީވެސްނުކުރެވޭ ފަދަ ހާލަތްތައް ދިމާވެފާ އެބަހުއްޓެވެ. ފާހަގަކޮށްލެވޭ އެއްކަމަކީ މާލޭގައި ދިރިއުޅުމުގެ މުހިންމުކަން ބޮޑުވެގެން އައި ދުވަސްވަރު ރަށްފުށުގެ ގިނަބަޔަކު މާލޭމީހުންނާ އިނުމަށް ސަމާލުކަން ދިންކަމެވެ. އެހާލަތުގައި ހިތުތެރޭގައި “ގަދަކަމުން” ލޯބި އުފައްދަނީއެވެ. މިފަދަމީހުންނަށް ރީތިވާނީ ލޯބިވުމުންނެވެ. މީގެ ކުރީދުވަސްވަރުގައި އެއްރަށެއްގެ މީހަކު އަނެއްރަށެއްގެ މީހަކާ އިނުމަކީ ވަރަށް މަދުންނޫނީ ނުކުރާ ކަމެކެވެ. ނަމަވެސް އާދަކާދަޔާއި ދިރިއުޅުމުގެ ހާލަތާއި މުވާސަލާތަށް އައި ބަދަލުތަކާއެކު އެކި ރަށްރަށުގެ މީހުންނާއި ލޯބީގެގޮތުން ގުޅި ކައިވެނިކުރުން މިވަނީ އާއްމުވެފައެވެ.
ވަރަށް އެހެންކަހަލަ ގޮތަކަށް ގުޅުނު ދެމަފިރިޔަކާވެސް ދިމާވިއެވެ. އަންހެން ކުއްޖާއަކީ ދެކުނުރަށެއްގެ ކުއްޖެކެވެ. ފިރިހެން ކުއްޖާއަކީ އުތުރުގެ ރަށެއްގެ ކުއްޖެކެވެ. ދެމީހުން ކިޔަވަން އައިސް ކުޑައިރުއްސުރެ މާލޭގައި އުޅުނީ އެއްކޮށްޓެއްގެ ދެކޮޅުގައި ހުރި ދެގޭގަގެއެވެ. ދެމީހުން ފުރާވަރަށް އެރުމަށްފަހު އެކިކުދިންނާއެކު ހުއްސަރިބައި ވާހަކަދައްކަން ތަންތަނަށް ގޮސް އުޅުމުގެ ތެރޭގައި ދެކެފަރިތަކަން އުފެދުނެވެ. ރާއްޖެތެރޭން އައިސްތިބި ކުދިންވީމާ މާލޭން މީހަކާއިނުމުގެ ޝައުގުވެރިކަން ދެމީހުންގެ ހިތުތެރޭގައިވެސް އޮތެވެ. ފިރިހެންކުއްޖާ ހީކުރީ އަންހެން ކުއްޖާއަކީ މާލޭރަށްވެއްސެއް ކަމަށެވެ. އަންހެންކުއްޖާވެސް ހީކުރީ ފިރިހެންކުއްޖާއަކީ މާލޭ ރަށްވެއްސެއް ކަމަށެވެ. ކުރެވުނު ހީގެމައްޗަށްބުރަވެ އެކަކަށްވެސް އެވާހަކަ ސީދާކޮށް އަހާކަށް ނުކެރުނެވެ. ދިރިއުޅޭނީ ކޮންގެއްގައިކަން ކަނޑައަޅަން ނޭނގުނަސް ކައިވެނި ކުރުމާ ހިސަބަށް ގުޅުން ގާތްވިއެވެ. ހުރިހާކަމެއް ފަޅާއެރީ ކައިވެނި ކުރަން އުޅުމުން ލިޔެކިޔުންތަކުންނެވެ. އޭރު ދެމީހުންގެ މައިންބަފައިނާއި އާއިލާގެ މީހުންނަށްވެސް ކައިވެނީގެ ކަންތައްއޮތީ އަންގާފައެވެ. އަންހެންކުއްޖާ ބުނީ ކަންތައްތައް އެހިސާބަށް ދިޔުމުން މޫނަށްލަދަށް، އެހެންގޮތެއް ނެތިގެން އެކައިވެނިކުރީ ކަމަށެވެ. ނަމަވެސް ތަނެއް ކުއްޔަށް ހިފައިގެން އަހަރެއްހާދުވަހު ދެމީހުން އެކުގައި އުޅެންޖެހުމުން އެކަކުއަނެކެއްގެ މައްޗަށް ހަމްދަރުދީވެ، ހަގީގީލޯބިވެވުނީ ކަމުގައެވެ. ދެމަފިރިން ހެވިފައިތިބެ ބުނީ ނޭނގިނަމަވެސް އިނދެވުނުކަމުން މިހާރުމިތިބީ ގަދަލޯބިން ގުޅި މާލޭމީހުންނަށް ވެފައިކަމަށެވެ. ލޯބީގެ ދުނިޔޭގައި މިކަހަލަ ކިތަންމެ ކަމެއް ދިމާވާނެއެވެ.
ލޯބިވުމުގައި ޒުވާންކުދިން ބަލާއުޅޭ މިންގަނޑު ތަކެއްވެސް ހުންނަކަން ފާހަގަކުރެވުނެވެ. ފެޝަނަކީ މައިގަނޑު ދައުރެއް އަދާކުރާ ކަމެކެވެ. ފިރިހެން ކުއްޖަކަށް ބަލާނަމަ އިސްތަށިގަނޑު ހަދާފައި ހުންނަ ސްޓައިލް، އަޅާ އަވިއައިނު، ލާފައިހުންނަ ގަމީސް، ޖީންސް، އަރާފައިވާން، ބޫޓަށް ބަލައެވެ. އަދި ގެންގުޅޭ ފޯނާއި، ދުއްވާފައިދާ ސައިކަލާއި، ޖަހާ ސެންޓަށް ބަލާއިރު އެމީހުން ކޮފީއަށް ގޮސްއުޅޭ ކެފޭތަކުގެ ފެންވަރަށްވެސް ބަލައެވެ. އަންހެން ކުއްޖަކަށް ބަލާއިރުވެސް ދާދިއެއްކަހަލަ ސަބަބުތަކެކެވެ. އަންހެން ކުއްޖާގެ އިސްތަށިގަނޑު ހަދާފައި ހުންނަގޮތް ބަލައެވެ. ބުރުގާއަޅާ ކުއްޖެއްނަމަ ބުރުގާއަޅާ ސްޓައިލަށް ބަލައެވެ. ހަމައެގޮތަށް ލާހެދުމާއި، އަރާފައިވާނާއި، ކަރާއި އަތްފައިގާއި ހުންނަ ގަހަނާއަށް ބަލައެވެ. ބޮޑީ ޝޭޕާއި، ޖަހާސެންޓާއި ކޮފީއަށްދާ ތަންތަނާއި، ގުޅުންއޮންނަ ގުރޫޕްތަކާއި، ސޯޝަލް ނެޓްވޯކްތަކުގެ ކޮންޓެންޓަށްދަންދެން ބަލާކުދިންވެސް އުޅޭކަން ފާހަގަކުރެވުނެވެ. ކިޔަވަމުންދާ ކޮލެޖާއި، އަދާކުރާ ވަޒީފާ ނުވަތަ ކުރާ މަސައްކަތަކީ ދެޖިންސުންމެ ބަލާ ކަންތައްތަކެވެ. އިސްވެ ލޯބިހުށަހަޅާ ކުދިން ބުނަނީ އެކަންކަމަށް ބަލަނީ އެކުދިންގެ މިޒާޖާގުޅޭ ބައިވެރިންނާއެކު ދިރިއުޅެން ފަސޭހަވާނެތީ ކަމަށާއި، އެކުގައި އުޅެވޭވަރުގެ ތަނަވަސްކަމެއް ހުރިތޯ ބަލަންވެސް އެމިންގަނޑުތައް ބޭނުންކުރާ ކަމަށެވެ. މިފުރާގެ ގިނަކުދިންގެ ވާހަކަތަކަށް ބަލާއިރު ގިނަ ޒުވާނުން ބުނަނީ ލޯބިވަނީ ރީތިވީމަ ކަމަށެވެ.
މީގައި ފާހަގަކޮށްލަން ޖެހޭ އެއްޕޮއިންޓަކީ އެކި މީހުންނަށް ރީތިވަނީ އެކިގޮތަށް ތިބީމާކަމެވެ. އެއްވެސް މީހަކަށް ރީތިނުވެގެން، ނުވަތަ ލޯބިނުވެގެން ބާކީވެފައި ހުންނަ އަންހެން ކުއްޖެއް ނުވަތަ ފިރިހެން ކުއްޖެއްވެސް ވަރަށްމަދުވާނެއެވެ. މިގޮތަށް މެދުވެރި ނުވާނަމަ އުފެދޭނެ އެތައް އިޖުތިމާއީ މައްސަލައަކުން ސަލާމަތްވަމުން މިދަނީ އެހެންވީމައެވެ. ލޯބިވާތީ ރީތިވިޔަސް ރީތިވީމަ ލޯބިވިޔަސް، ލޯބީގެ ދަގަތްފާނަށް ދަމައިގަތުމަށްފަހު އޭގެން ސަލާމަތްވާނީ މަދުމީހެކެވެ. ސަބަބު ނޭންގޭ އެކްސް ފެކްޓަރއެއްގެ ސަބަބުން ހީވެސްނުކުރެވޭ ގޮތަކަށް ލޯބި ކަފިކަފިވެގެން ދާކަމަށްވެއެވެ. ވުމާއެކު ސުވާލުގެ ޖަވާބުލިބޭނީ ލޯބީގެ ފުންކަނޑުގައި ފީނައިގެން ހޯދާ އަމިއްލަ ތަޖުރިބާއިން ކަމުގައި ފެނެއެވެ.
1 comments:
Mashah hama bune veynee, reethi v maey loabi vanee... Mashah ves libunu ehkala kahala lan'deh... Thaneh dhoreh nubalaa phone in biteh nagaigen ulhenikoh, rangalhah egunu iru mikaleyge v aharun bappa menna eku raazuvaa kulhen ulhey muskulhi group ge meehakah... haadha foosseh vi ey... ekamaku reethi meehun hoadhan ulhumakee risky kameh... ~ Juma ~
Post a Comment